O‘zgaruvchan qalinlikli qovushqoq-elastik plastina va qavariq qobiqlarning nochiziqli parametrik tebranishlarini baholash uchun samarali algoritm va dasturlar ishlab chiqish
Ushbu dissertatsiya ishida O'zbekiston Respublikasi Oliy ta'lim, fan va innovatsiyalar vazirligi huzuridagi Oliy attestatsiya komissiyasida B2023.2.PhD/FM885 raqam bilan roʻyxatga olingan fizika-matematika fanlari boʻyicha falsafa doktori (PhD) dissertatsiyasi mavzusi oʻrganilgan. Tadqiqotda oʻzgaruvchan qalinlikli, qovushqoq-elastik plastinalar va qavariq qobiqlarning nochiziqli parametrik tebranishlarini baholash uchun samarali algoritm va dasturlar ishlab chiqish koʻzda tutilgan. Tadqiqot doirasida nazariy hamda amaliy natijalar keltirilgan bo'lib, ular qurilish va muhandislik sohasida katta ahamiyatga ega.
Asosiy mavzular
- Kirish: Mavzuning dolzarbligi, maqsad va vazifalari, tadqiqot ob'ekti va predmeti, muammoning oʻrganilganlik darajasi, ilmiy yangiligi va amaliy ahamiyati bayon etilgan.
- 1-bob. Oʻzgaruvchan qalinlikli qovushqoq-elastik plastinalar va qavariq qobiqlarning parametrik tebranishlarini baholash uchun matematik model ishlab chiqish: Bu bobda taniqli adabiyotlarning tahlili, materialning qovushqoq-elastik xususiyatlarini hisobga olgan holda oʻzgaruvchan qalinlikli plastina va qavariq qobiqlar kabi yupqa devorli konstruktsiya elementlarining parametrik tebranishlari masalasini tuzishning nazariy asoslari va matematik modeli berilgan. Shuningdek, nochiziqli geometrik koʻrinishda oʻrganilgan.
- 2-bob. Oʻzgaruvchan qalinlikli qovushqoq-elastik plastinalar va qavariq qobiqlarning parametrik tebranishlarini baholash masalalari tenglamalarini yechish usullari va algoritmi: Bu bobda nazariy ishlanmalar asosida matematik modellar ishlab chiqilgan, ularni hisoblash uslublari va algoritmlari yaratilgan. Xususan, koʻchishlarning koʻphadli approksimatsiyasi usuli bilan oʻzgaruvchan qalinlikli plastinalar va qavariq qobiqlar uchun parametrik tebranishlar masalalari yechilgan.
- 3-bob. Oʻzgaruvchan qalinlikli qovushqoq-elastik izotrop va ortotrop toʻgʻri burchakli plastinalar va qavariq qobiqlar nochiziqli parametrik tebranishlarini baholash: Bu bobda oʻzgaruvchan qalinlikli plastinalar va qavariq qobiqlarning nochiziqli parametrik tebranishlari oʻrganilgan. Taqribiy yechimning sonli qiymatlari keltirilgan va turli parametrlarning ta'siri tahlil qilingan.
- Xulosa: Dissertatsiya natijalari boʻyicha asosiy xulosalar va tavsiyalar keltirilgan. Tadqiqotdan olingan natijalar amaliyotga joriy etish imkoniyatlari koʻrsatilgan.