Жигар циррози бўлган беморлар учун пробиотикларга бой бўлган овқат қўшимчалари киритилган парҳез самарадорлигини аниқлаш

Ushbu dissertatsiya jigar sirrozi bilan kasallangan bemorlar uchun probiotiklar va mahalliy taomlardan iborat parhezning samaradorligini aniqlashga bag'ishlangan. Tadqiqotda probiotiklarning jigar faoliyatiga ta'siri, qondagi bioximik ko'rsatkichlarga ta'siri o'rganilgan va ushbu bemorlar uchun yangi parhez usullari taklif etilgan. Tadqiqot natijalari bemorlarning sog'lig'ini yaxshilash va hayot sifatini oshirishga qaratilgan.

Asosiy mavzular

Kirish: Dissertatsiyaning dolzarbligi, maqsad va vazifalari, tadqiqot obyekti va mavzusi bayon etilgan. Tadqiqotning respublika fani va texnologiyalari rivojlanishining ustuvor yo'nalishlariga muvofiqligi, ilmiy yangiligi va amaliy natijalari, ilmiy va amaliy ahamiyati ochib berilgan. Tadqiqot natijalarini sog'liqni saqlash amaliyotiga tadbiq etish haqidagi ma'lumotlar va nashr etilgan ishlar haqida ma'lumot berilgan.
1-bob. Jigar shikastlanishining etiopatogenezi, diagnostikasi va davolanishi haqida zamonaviy konsepsiyasi (adabiyotlar mushohadasi): Bobda jigar shikastlanishi natijasida kelib chiqadigan kasalliklar va uning natijasi bo'lgan asoratlarning rivojlanishining asosiy sabablari, patogenetik mexanizmlari, tasnifi va diagnostika hamda davolashning standart mezonlari yoritilgan. Adabiyotlar asosida batafsil o'rganishni talab qiladigan bir qator masalalar aniqlashtirilgan.
2-bob. Tadqiqot materiallari va usullari: Bobda tadqiqot obyekti, predmeti va usullari batafsil yoritilgan. Jigar sirrozi tashxisi qo'yilgan bemorlarning salomatlik holatini o'rganish uchun gigienik, klinik-instrumental va klinik-laboratoriya tadqiqot usullaridan foydalanilgan. Eksperimental jihatdan jigar shikastlanishi tekshirishda ham laborator va morfologik tadqiqotlar o'tkazilgan.
3-bob. Jigar shikastlanishining profilaktik tadbirlari va eksperimental tadqiqotlar: Bobda eksperimental jihatdan jigar shikastlanishining profilaktik tadbirlari va jigar shikastlanishini davolashda probyotiklarning samaradorligi o'rganilgan. Probiotiklarning toksikologik xavfsizligi va jigar kasalliklari markerlariga ta'siri tekshirilgan.
4-bob. Jigar sirrozi bilan kasallangan bemorlar uchun parhez samaradorligini asoslash: Bobda jigar sirrozi bilan kasallangan bemorlarning ijtimoiy ahvoli, kasallikning asosiy nozologik shakllari va parhez samaradorligini hayot sifati ko'rsatkichlari bilan baholash o'tkazilgan. Probiotiklar bilan boyitilgan parhezlarning bemorlar salomatligiga ta'siri tahlil qilingan.
Xulosa: Dissertatsiya mavzusi bo'yicha olingan asosiy xulosalar va takliflar keltirilgan. Probiotik BCT ning toksikologik xavfsizligi, jigar sirrozi bilan kasallangan bemorlar uchun parhez samaradorligi va uni qo'llash bo'yicha tavsiyalar bayon etilgan.